日本中四國秘境溫泉周圍行

總結

2006-07-14T10:09:00.000+08:00

行程:
Day 1 香港 -> 大阪
Day 2 大阪 -> 淡路 -> 鳴門 -> 大/小步危 -> 秘景之湯 -> 琴平
Day 3 琴平 -> 金刀比羅宮 -> 松山 -> 道後溫泉
Day 4 道後溫泉 -> 大島 -> 尾道 -> 出雲
Day 5 出雲 -> 日御崎 -> 出雲大社 -> 島根 Winery -> 境港 (妖怪之道) -> 鳥取砂丘
Day 6 鳥取砂丘 -> 余部鐵橋 -> 城崎溫泉 -> 大阪
Day 7 大阪
Day 8 大阪 -> 香港

車: 經 Tocoo 租 Mazda, 660cc AZ Wagon, 連 portable GPS, 五日, 20500 yen
里數: 約 1267 km
汽油: 約 11000yen
路費: 約 16000yen

Day 8 - 最後衝刺

2006-05-27T00:04:00.000+08:00

今日係旅程o既最後一日, 醒起明天係長周要返工就開始後悔點解唔羅埋o個半日 AL. Anyway, 今日繼續行街 shopping. 先去黑門市場, 行行o下見到有間天富羅店有新鮮炸起o既炸蝦天富羅. 買o左兩件仲送o左舊番薯天富羅, 驚死利食唔飽咁, 不過新鮮o既炸蝦天富羅又真係好好食. 除o左天富羅, 無乜o野好買, 也不見有雞泡魚賣 - 奇. 記得 97 年o既時候, 周圍都係巨型雞泡魚.

行過對面電電街, 只得一個感覺 - 呃遊客, 速速行埋 Bandai shop 就走人. 從電電街向難波方向行, 經過道具街. 這是我第一次o黎道具街. 老婆見到一個用卡式石油氣o既串燒爐, 價錢唔貴 (唔記得價錢, 只記得唔貴), 心思思想買返o黎香港, 但係又擔心香港 d 卡式石油氣唔o岩用, 結果都係冇買到.

由道具街繼續前行, 去到吉本興業o既劇場, 兜o左個圈, 全冇興趣. 繼續行去難波, o係 OCAT 食完午餐後就返酒店取回行李往機場, 完成今次日本之旅.

未來預告 - 兩個月內去了兩次日本, total 16 日, 我自己也覺得過份, 加上荷包乾塘, 相信短期內不會再去日本. 或者遲些會用免費機票去一趟台灣過過冷河才再去日本血拼.

Day 7 - 買o野買到唔停得手

2006-05-26T23:56:00.000+08:00

今日全日都係 shopping day. 先去心齋橋 Book off 買二手 CD DVD. 然後去大黑屋買南海電鐵 rapi:t 車票, 1300 yen (原價 1390 yen). 午餐去o左自由軒食咖哩, 然後去 LOFT. 之後返酒店放低 d 戰利品後再去日本橋大黑屋藥房第三次掃貨. 然後去 Bic Camera 100 yen shop 同睇 DVD, 不過嫌佢太少，買唔到 target o既慎原敬之演唱會 DVD, 於是轉戰梅田o既 Yodobashi, 終於買到隻 DVD.

晚飯先去梅田餃子博物館食餃子, 然後返酒店休息一陣, 再去 day 1 去過o既和牛炭燒舖食炭燒和牛. 最後去酒店隔籬間超市買埋o野, 就完成今日o既 shopping day.

Day 6 - 城崎 revisit

2006-05-26T00:01:00.000+08:00

(click 圖放大)

駕車五天全程:

(click 圖放大)

今日係租車o既最後一日, 亦都係最黑仔o既一日, 不但落大雨, 仲遇上大塞車, 幾乎趕唔切還車.

8:30am check out 後再去多一次鳥取砂丘. 昨天因為太晏, 都無行去海邊, 今日再去本來想行過去另一個砂丘頂同海邊, 但係行o左唔夠 10 分鐘就開始翻風落雨, 只好放棄改為去土產店買手信. 特別推介一盒梨味草餅, 係綠色的, 好好味, 同事都話好食. 另外, 有好多喬頭賣, 不過，味道一般, 唔夠香港 d 好食, 反而有隻喬頭毛公仔好 cute, 買o左隻返屋企擺.

買完o野, 繼續行程往余部. 車程約一個鐘. 余部最出名的就是余部鐵橋. 它是日本最高o既鐵造火車橋. 由於此橋曾發生嚴重意外, 所以橋底設有佛像供奉, 而火車於強烈側風下也會暫時停駛, 不可過橋, 以放再次發生意外. 約 10:00am 去到余部, 雨也越落越大. 首先把車停在橋底停, 有一條山路係可以由停車場行上余部站, 不過太大雨, 無辦法行, 結果只能於橋底影相. 離開時, 見油站旁有一條小路上山, 於是膽粗粗楂上去睇o下, 發覺景觀也不錯, 不過 d 雨太大, 影幾張相之後就離開前往城崎溫泉.

12:00pm 到達城崎溫泉. 將車泊於車站旁市營停車場, 隨即往隔籬 "さとの湯" 浸溫泉. 溫泉設有桑拿同露天溫泉, 最特別係有冷凍室. 冷凍室內只得 0 度, 牆上裝有金屬板, 上面結o西霜. 浸完熱辣辣o既溫泉走入去冷凍室過一過冷河, 甚至張身體貼向金屬板度, 感覺超爽. 在露天溫泉同冷凍室之間走了 4,5 轉, 加上無其他人, 真係過足癮.
浸完溫泉後去食 lunch. 我要了旦馬牛肉 set, 老婆就點了蟹肉飯 set. 食完飯後再去車站旁足湯浸腳, 約於 2:00pm 離開.

駕車沿 R312 南行往和田山上 highway, 以為時間尚早, 還去了一個鐘 Jusco, 點知去到和田山 IC 入口才發現因為要修路而封了, 唯有繼續行 R312 到下一個 IC 才上 highway. 這還未止, 當車駛到大阪高速 11 號線時, 因前面發生交通意外全線封閉, 結果原本15分鐘o既車程足足用了兩個鐘, 7:55pm 才把車駛回租車公司 (租車公司 8:00pm 關門).

8:30 pm check in 大阪富士屋酒店, 然後去道頓崛食晚飯. 入了一間炸串元祖食炸串, 有肉, 有菜, 有年糕甚至芝士. 點特製醬汁o黎食, 好味得o黎又不油膩, 有機會一定再去, 不過要記住每串只能點醬汁一次, 食過後絕不可再點醬汁, 因為 d 醬汁係一大兜放係度用, 用完後, 店員只會用一個隔o黎隔一隔 d 雜質, 讓下一位人客使用, 如果食過之後再點醬汁o既話, d 口水落o西 d 醬汁度, 太唔衛生了.

食完晚飯都已經 10:00pm, 去心齋橋 d 舖頭大部份也關了, 去書店買o左幾本旅遊書, 再返去激安之殿堂行o下, 然後返酒店.

Day 5 - 神之國度, 出雲

2006-05-25T23:56:00.000+08:00

(click 圖放大)

出雲, 一個經常給人一種神秘感o既地方. 出雲大社更加係表表者. 據說，福神─大國主下令把自己領地上的一塊土地出賣給了另一位神，作爲報酬換到了出雲, 也有說出雲是眾神聚集開會之地, 所以, 說出雲是神之國度也不為過.

8:30am 從酒店check out 取車後隨即向北前往出雲大社一帶, 主要景點有出雲大社, 島根 Winery 同日御崎, 路順係島根 Winery -> 出雲大社 -> 日御崎. 大約 9:10am 已經到達島根 Winery, 不過佢要 9:30am 才開門, 於是先去日御崎. 往日御崎條路沿海而建, 兩邊都係峭壁, 一邊係山, 一邊係日本海, 彎彎曲曲的, 好有 City Hunter 裏面o個 d 飛車追逐 feel, 不過, 現時有部份路段已被隧道取代了.

9:30am 去到日御崎神社, 除了我們之外, 就沒有其他遊客. 神社o既建築以橙色柱襯白色牆, 好似平安神宮, 不過規模就細好多. 神社內也沒有什麼特別, 也沒有觀光指南, 奇就奇在連土產店也沒有. 真正係到此一遊.

9:40am o係日御崎神社逗留了十幾分鐘就繼續向日御崎燈塔前進. 日御崎燈塔係日本最高o既石造燈塔, 高 43.65m (燈台高 38.8m), 有過一百年o既歷史 (明治 36 年 [1903] 啟用). 去到日御崎燈塔, 終於有點人氣了(雖然都只係得小貓三四隻), 土產店也有兩三間在營業. 燈塔底層有展覽廳展示與燈塔有關o既展品, 免費入場, 如果要上燈塔上面, 就要 150 yen. 全個燈塔也鬆上白色的漆油, 配合藍天白雲, 簡直係最美的風景畫. 燈塔對開就係日本海, 唔怕危險可以行出去懸崖影相同睇浪. 返回停車場時, o係土產店買o左一隻燒海騾食 - 當然唔夠琴日o個 d 咁好食啦 :p

10:10am 離開日御崎往出雲大社, 去到出雲大社, 但係找不到出雲大社停車場個入口 (可能係行得太快 miss o左), 唯有泊遠一點, 泊o左去道之駅. 由道之駅行去出雲大社約 10 分鐘, 途經巨型白色鳥居同一畑電鐵出雲大社前站. 出雲大社前站幾特別, 用有顏色o既玻璃做裝飾, 好有宮崎俊千與千尋 feel.

出雲大社有數百年歷史, 經歷過多次重建, 現在o既出雲大社重建於18世紀. 由出雲大社正門鳥居進入, 沿碎石路一路向本殿行, 約 6, 7 分鐘. 本殿並不開放給公眾參觀, 到達本殿後, 只能於門外參拜. 要一睹本殿, 就要從兩旁望入去.

去完本殿, 去隔籬神樂殿睇巨型稻草繩. 稻草繩重達 5 噸, 上面攝滿 coins. 話說如果拋一個 5 yen 上稻草繩而能夠卡著冇跌翻落o黎o既話, 就能夠達成願望. 我當然也要試一試, 不過冇 5 yen, 只好用 10 yen. 初初以為好易, 但拋起上o黎卻一 d 都唔容意, 拋了6,7 次才成功. 老婆仲勁, 一擊即中, 不過唔係擊中條稻草繩, 而係擊中另一個也在拋 coins o既女士o既手臂. 連忙向佢猛咁 say sorry "すみません". 拋o下拋o下, 突然有個 100 yen 從稻草繩跌o左落o黎 (咦,咁快願望成真??) 我當然冇張個 100 yen 據為己有啦, 又張佢拋翻上去條稻草繩道.

11:20am 起行前往島根 Winery. 見學o既話, 真係冇o野好睇, 頂多睇o下 d 釀酒設施, 冇什特別, 反而係売店有睇頭. 売店內有好多試飲, 唔似香港咁有個阿嬋每次倒少少過你試, 而係大大方方一盆盆放o係到任你飲, 仲有冰鎮保冷, 可恨一陣還要駕車, 唔飲得, 只能細細口試o下味, 相反 d 跟團阿伯就o係道猛飲. 我們可不是白飲的, 還買了兩枝紅酒返香港.

12:15pm 離開島根 Winery 後隨即沿 R431 前往境港. R431 沿宍道湖北岸而行, 經松江市往境港. 大約 2:00pm 到達, 在 JR 境港站附近停車場泊好車後, 行往境港站, 剛好有"鼠男" 列車到站, 當然唔會放過影相o既機會. o係境港站旁邊, 正好是妖怪之道 (鬼太郎 - 水木しげるロード) o既起點. 成條妖怪之道有好多唔同造型o既妖怪石像, 不過我自己唔係鬼太郎 fans, 除了鬼太郎, 鼠男同眼球老爹 (好似仲有個細路女的) 之外, 對其他o野一無所知, 所以, 全無 feeling 可言. 沿妖怪之道前行往商店街, 有一半無開, 原來今日 (星期二) 係水木しげる記念館o既定休日, 唔怪得知啦.

3:30pm 離開境港, 行 R431 轉 R9 , 沿日本海東行往鳥取, 中途見到不少風力發電場, 每個發電場都有 5, 6 組風車發電機. R9 交通都幾繁忙, 大部份時間都只能以 50km/h 行駛. 為了趕及日落前到達鳥取砂丘, 全程只停了 Jusco 一次休息.

6:30pm 到達鳥取砂丘. 當時天色還很光, 但所有土產店同停車場早已經關門 (哈! 可以免費泊車). 從停車場o既砂丘入口行十數級樓梯即到鳥取砂丘. 鳥取砂丘o既形成, 係由於附近o既河流將沙沖出海, 而海風把沙吹回岸邊堆積而成. 砂丘範圍好大, 堆得很高, 由海面計, 可能有成 10 層樓咁高. 砂丘並不是一片平坦, 有高低起伏, 向入口o既一面斜坡, 早已被人寫滿到此一遊或者係示愛宣言. 砂丘係向西的, 好天o既話, 於日落時份可以看到好正o既日落景色.

7:00pm 於鳥取砂丘逗留o左約 30 分鐘, 然後駕車往鳥取站附近酒店 check in.

Day 4 - 島波海道

2006-05-25T23:51:00.000+08:00

(click 圖放大)

7:00am 今日係車程最長o既一日. 一大清早又走o左去酒店溫泉浸浸. 由於男女湯互換了, 現在浸的是昨晚o既女湯. 個露天風呂好正, 不過 d 水唔多夠熱. 可能時間尚早, 又係一個人獨佔了成個露天風呂 :) 浸了差不多10多20分鐘才開始有人o黎浸.

9:00am o係旅館食完令人肥幾磅o既早餐, 約 9 點 check out. 駕車沿市電路軌經過大街道同正在維修o既松山城, 然後向西行上 R 196, 正式開始今日o既行程. R196 沿海岸線向北行, 風景不錯. 行了約 1.5 個小時到達今治. 上 highway 前o係 jusco 買定午餐.

11:00am 上highway. 呢段 highway 叫做島波海道, 由 7 條大橋以跳飛機型式一個島去一個島, 經過 6 個島連接本州o既尾道同四國o既今治. 由今治 IC 上 highway, 首先經過來島海峽大橋 (來島海峽大橋一共分成三條吊橋, 跳過兩個小島) 到達大島, 於大島南 IC 離開 highway 往大島, 感受一下小島風情 (什麼係小島風情? 我也不知道, 可能係 "寧靜 + 人蹟罕至 + 陽光普照 + 海 + 陣陣海風"). 首先前往道之駅　いきいき館, 由大島南 IC 計, 車程約 5 分鐘. 起初 plan 去呢道係因為可以近距離睇來島海峽大橋, 點知有意外收穫 - 炭燒海鮮餐廳. 間炭燒海鮮餐廳就位於道之駅內. 有一個巨形水池飼養海鮮, 有魚, 扇貝, 海騾, 魷魚.... etc. 任你揀, 付款後有人幫你起埋個炭爐你燒. 我就買o左海騾, 扇貝同蜆, 1800 yen. 加埋o係今治 Jusco 買o既串燒, 就成為今日o既午餐.

12:20pm 食完炭燒, 繼續起行, 去龜老山展望公園. 由此公園可鳥瞰瀬戶內海同來島大橋. 往龜老山o既一段路係單線雙程行車, 不過車好少, 沒有大問題. 上到公園, 除了我們, 就只有另外一個家庭一行四人, 可說是小貓三四隻, 苦了o係山上開檔賣雪糕飲品o既阿叔.

o係山上留了約 30 分鐘, 影o左大批相片之後, 約於12:50pm 離開. 由於大島南 IC 係單向 IC, 要上　highway 往尾道, 必須行 R317 穿過大島往大島北 IC 才可上 highway. 行走於 R317 時又有意外收穫 - 二手 CD 舖 Book Off. 過去兩日由於無 CD o係手, 一直只能聽收音機兼收得唔好, 成日都"示呢沙啦", 見到 Book Off, 立即入去掃二手 CD, total 買o左 7 隻, 2700 yen, 仲有一張 100 yen cash coupon 送添.

由大島北 IC 重上highway, 經過大島大橋, 大三島橋, 多多羅大橋, 生口橋, 因島大橋, 尾道大橋, 終於重返本州.

2:00pm 到達尾道, 由於行錯路 (又係因為信錯 GPS 而唔跟路牌行), 兜來兜去, 要 2:15pm 才抵達千光寺公園, 本來想求奇打個圈才走人, 點知泊車要 500 yen (全日), 感覺好唔抵, 無理由停十幾二十分鐘都要 500yen o架嘛, 於是放棄千光寺公園, 起行前往出雲.

往出雲可以行 highway, 不過要兜一個大圈, 仲要成 6000 yen. 另一條路係行 R184 穿過山脈. 我選了後者. 行 R184 又顯示出個 GPS o既不濟. 個 GPS show 出o黎條路係一條好窄o既舊 R184. 其實多年前已有一條又直又闊o既新路. 好彩條舊路o係最近封了, 只好跟隨路牌指示, 誤打誤撞上o左條新路, lucky. 唔計新路o個部份, R184 唔算難行, 不過好多地方都無街燈, 如果要夜晚行就真係要想清楚. 亦由於個 GPS 真係唔多得, 由那時開始就開始信o西路牌同部 notebook 裏面個電子地圖.

由 2:30pm 開始, 約 6:15pm 到達出雲. 途經一小型超市, 又再補充一下物資, 然後去東橫 Inn check in. 出雲東橫 Inn 個 car park 一晚 500 yen, 係立體駐車場, 我都係第一次用. 首先去 counter 取一張 proximity card, 然後去位於駐車場入口旁o既 control panel o都 card, 個駐車場就會自動轉到去一個空位. 閘門打開後, 把車駛入去, 停好架車後, 再按關門掣, done.

check in 後, 出去食晚飯. 酒店附近有點像紅燈區, 舖頭外面也沒有餐牌, 都係走為上著. 行過去火車站另一面, 有點兒荒蕪, 好彩仲有間 Suki ya 同 Lawson. o係 Suki ya 食o左個牛肉飯配豬肉味憎湯做 dinner, 都幾好味. 食完飯, 發覺真係冇o野好行, 唯有早 d 返酒店休o下息, 睇o下電視上o下網 (可惜咁o岩 ec2japan down o左, too bad).

Day 3 - 道後溫泉 3000 年

2006-05-25T23:45:00.000+08:00

(click 圖放大)

7:00am 酒店有大浴場, 一大清早去浸一浸, 成個人精神o西.

9'00am o係酒店食完送o既早餐, 就駕車往金刀比羅宮. o係金刀比羅宮山腳有好多停車場 (只係一片空地), 但都是沒有標明價錢的, 不停有人叫你入去泊車, 相信 d 停車場係 d 土產店o既. 問佢幾多錢, 講了一大輪都唔知點, 只聽得懂什麼 1000 yen 的, 算吧, 都係睇o下有無標明駕錢o既停車場. 轉了一圈, 見到有 500 yen 一天o既停車場, 想也不想就泊入去, 還好, 這停車場有部份係有蓋的, 不用淋雨.

9:30am 開始行上金刀比羅宮, 全程約 800級樓梯 (以前往本宮計). 樓梯不算難行, 有很多地方可以休息, 而且不是連續的, 一段一段有平地隔開, 比起山寺, 是容易得多. 行了無幾耐就開始落雨, 只好o係土產店買把遮.

10:00am 用了大約半個鐘就到達本宮, 呢道可以睇哂整個琴平. 行o左一陣, 雨越落越大, 沒有太大興趣繼續逗留, 買過御守之後就離開.

10:45am 返到停車場, 仍然好大雨. 膝頭以下全濕. 好彩車位係有蓋的, 否則, 必定超級狼狽. 開車後沿 R32 往善通寺 IC 上 highway. 雨很大, 有陣時水撥開到最快也末能睇清前面.

2:00pm 到達松山巿. 見到有間大型 Jusco, 入o左去行超巿. 停了約 45分鐘, 然後繼續向道後溫泉出發. 不幸地再次行錯路, 入o左 d 小路, 幾經辛苦才重返大路, 見到市電o既路軌, 一身鬆哂. 由於當年玩 "電車 Go 旅情編" 玩到廢寢忘餐, 對呢條松山市電係瞭如指掌, 沿住路軌行, 就可以去到道後.

3:00pm 到達古湧園. 未停定車已經有工作人員準備幫你開門同開定遮. 落車後, 立即有人幫你泊車同攞行李，簡直神速. Check in 後先上房間, 係頂樓的, 景觀不錯. 說明晚餐時間後, 先到酒店o既溫泉睇o下. 古湧園有 3 個湯, 每晚都會男女交替. 下午時間, 男湯係古湧の湯, 內有兩個露天風呂, 一個係木桶風呂, 一個係冬蟲夏草風呂. 入去之後發現完全無人, 真後悔無帶相機. 行返出o黎, 同老婆行去道後溫泉商店街, o係龍貓專門店見到一個千與千尋裏油屋o既模型, 其他地方未見過, 好靚, 不過已經賣哂 (油屋係參考道後溫泉本館設計的). 再行無幾遠, 就去到道後溫泉本館. 見有好多人, 都係夜 d 再黎過.

3:45pm 行o左去市電o既道後溫泉站, 剛好見到"少爺列車" 到站, 可以睇到佢o既人手掉頭.

(人手掉頭o既少爺列車)
睇完掉頭, 去o左對面腳湯浸腳. 順便睇埋カラクリ時計表演.

之後返回酒店浸溫泉. 晚飯選了有鮑魚同龍蝦o既 plan, d 飯菜放滿成張檯, 豐富極了.

食晚飯用了成個鐘, 稍為休息後再出去行街. 先去道後溫泉本館, 買飛入靈之湯. 入場後, 先往上層客室, 如果係日歸, 可換上提供o既浴衣, 如果係已經著住酒店浴衣, 不換也罷. 工作人員好努力好快咁講解, 但係, 我o既日文程度只能夠聽到貴重品要放 locker. 工作人員見我無反應兼傻o下傻o下, 用日文問我係唔係唔識日文 (原來工作人員係想叫我地先去參觀皇室專用o既 area 先).

去參觀皇室用o既湯, 除o左我同老婆, 同場只有另一位男士 (可能太夜啦), 有個阿伯負責帶 guide. 佢問我地邊樹黎o既, 我話香港, 仲以為個阿伯會唔知係邊, 不過都係阿伯好o野, 即刻話'咁遠呀!' (日文). 之後佢介紹 d 地方時, 都會講慢 d, 用多 d 手勢, 同英文單字. 講開呢個皇帝用o既溫泉浴池真是細得可憐, 只係比浴缸大少少, 深 d d. 之後, 上埋去睇夏目漱石間私人房間 (其實真係無o野好睇). 終於係時候去浸靈之湯. 個湯池不大, 約 5m 乘 2m, 而且只得一個池, 作為公眾外湯似乎有點兒太細, 不過 d 溫泉水夠o西熱, 好舒服. 初初入去浸o既時候, 仲有三個人, 無幾耐, 三個人都走o左, 凈翻我一個人獨佔成個靈之湯...呵呵呵. 浸完溫泉回到休息間, 還有餅干同熱茶奉送.

Day 2 - 四國, 好大風呀!

2006-05-24T15:57:00.000+08:00

(click 圖放大)

7:30am Check out 後, 坐兩個站地鐵去谷(田丁)九丁目, Mazda 天王寺店取車.
今次用 tocoo 租o左架 660cc k-car, 5 日只係 20500 yen, 好平. 以前直接o係
Nissan 或者 Toyota 租, 5 日起馬都要 30000yen 以上.

8:15am 開車. 第一個目的地係淡路 SA. 個 GPS 有 d 舊, 入 map code 個個都唔o岩,
入電話又 search 唔到, 最後求其跟住本書入一個四國o既電話, 終於 search 到一條
行明石大橋o既路. 其實呢段路我一早做好功課, o係 google maps 睇o左十幾廿次條路
點行, 就算無 GPS 都得.

8:25am 上大阪環狀線轉 3 號神戶線, 穿過神戶後, 經名谷 JCT 入垂水 JCT, 然後轉一個 180 度灣上神戶淡路鳴門自動車道 (千祈唔好行錯, 否則有排兜, 不過, d 路牌都好清楚o下, 唔算難行). 穿過舞子隧道就係現時世界最長o既吊橋-明石海峽大橋. 過橋時, 橫風都幾強, 架車有 d 被吹郁o既感覺.

9:05am 過o左明石海峽大橋, 第一條支路就係淡路 SA. 往淡路 SA 同淡路 IC 係使用同一條支路. 進入支路後, 再分一條線係往 SA, 一條線係往出口 IC, 唔好行錯, 我老婆最初仲以為呢條支路只係往出口添, 一個不留神唔敢出支路就會 miss o左個 SA.

9:10am 點解要去淡路 SA? 因為呢道可以睇o西成條明石海峽大橋, 仲可以坐觀覽車 (600 yen 一個人) 遠眺神戶同明石海峽一帶, 只可惜天氣不好, 一片灰茫茫. 另外, SA
商店都好多o野賣. 仲有, o係另一行車方向o既 SA 有一個叫做 highway oasis o既
地方, 有一個好大o既花園可以免費遊覽, 當然仲有必有o既商店啦. 唔好以為o係另一
行車方向就去唔到, 淡路 SA 一個特別之處就係可以 u turn, 即係可以經過 SA 返轉頭. 只要用張 highway 券過閘, 就可以自由地不限次數由一邊 SA 去到另一邊 SA.

9:30am 坐完觀覽車, o係淡路 SA 食早餐, 有串燒, 炸雞, 炸蝦餅, 魷魚餅, 雪糕, .............

10:00am 駕車往對面 Highway Oasis. o係公園入口行o下買o下o野. 有隻洋蔥毛公仔好鬼 cute, 買o左隻細o既返屋企擺.

10:30am 離開淡路 SA , 由於時間所限, 放棄前往果園士多o卑梨放題. o係 Highway Oasis 買o左包 300 yen o既士多o卑梨補數. 重上 highway, 直踩鳴門, 中途停了一個 PA.

11:45am 到達大鳴門橋, 過橋時, 橫風超強, 車速限制減到 40km/h, 車也被吹到偏離行車線. 從鳴門北IC 離開 highway, 沿縣道 11 往鳴門公園. 風仍然大, 陣風一吹, 路邊沙塵被吹起, 好似沙塵暴咁. 未到鳴門公園, 就o係轉上公園之前一個交通燈被"食蕉" 截住, 話停車場已滿, 要我行另一個方向去臨時停車場. 見到 d 臨時路牌, 話個臨時停車場只係o係黃金周期間使用, 並且會提供免費 shuttle 來回鳴門公園.

12:00pm 個臨時停車場真係無雷公咁遠, 車行也要 5,6 分鐘才到, 仲要係沙地, 風一吹, 沙塵滾滾, 好彩架車係租o既o者. 泊好車剛好有免費 shuttle o係度等緊客. 開車時, 全車爆滿, 估唔到會有咁多人. 往鳴門公園車程約十多分鐘.

12:15pm 到達鳴門公園. 於千疊敷展望台落車後, 先去影相. 拍照角度係從橋o既北面影過去 (相片中從左向右影), 高度則比橋面略低. 呢度也有不少記念品店, 行了一圈, 覺得不是太吸引.

12:30pm 下一站係去渦之道睇海潮. 渦之道入口就o係隔籬, 約兩三分鐘腳程就到. 渦之道其實係一條位於橋身底部o既通道 (相信係由工程通道改建而成), 可以步行至離岸邊 450米處o既展望室近距離睇海潮, 入場費 500 yen. 當然, 想再近 d, 可以坐遊覽船, 從海上超近距離睇, 不過最平也要 1500 yen 一個人. 進入渦之道, 第一個感覺就係超級大風. 通道兩旁只係用鐵絲網圍住, 所以基本上係無遮無掩的, 之前連車也吹得動o既風就打在身上, 就像打 8 號風球. 日本人都算體貼, 每 100 米就設有一個休息站, 兩邊有實牆擋風.

12:50pm 到達展望室. 海中間有一個範圍係特別大浪的, 至於漩渦, 就真係唔係幾睇到, 就算出現, 都係一舜即逝, 無甚睇頭.

1:30pm 離開渦之道前往お茶園展望台.　呢道o既拍照角度係從橋o既南面影過去 (相片中從右向左影), 高度則比橋面略高.

2:00pm 坐 shuttle bus 返去取車往大小步危. 先從鳴門北 IC 上 highway 往鳴門 IC, 然後行國道 11 往德島 IC 上德島道, 中途o係 Lawson 買便當做 lunch (後來發現 GPS 出o既呢條路線係行遠o左o既, 由鳴門北 IC 上 highway 後應該從板野 IC 離開高松道, 行縣道1 往藍住 IC 上德島道). 德島道係一條雙線雙程行車o既 highway, 遇上前面有慢車就無法爬頭, 只能以70-80km/h 行車.

4:00pm 於井川池田 IC 離開 highway 轉國道 32, 約 4 時許到達小步危, 發覺無o野睇兼無地方停車. 沿路一直駛往大步危, 見有一間物產資料館便入去稍作停留. 可能未到夏天, 大步危段o既吉野川水流平靜, 只見到川o既兩岸都是大小不一o既石頭.

5'30pm 離開物產資料館, 前往祖谷秘境之湯, 約 6 時到達. 祖谷秘境之湯其實是溫泉酒店o既溫泉, 晚上 9 時前開放給日歸使用. 呢個湯有露天溫泉, 不過 d 水唔夠熱.

7'00pm 離開祖谷秘境之湯往琴平. 沿國道 32 號向北行, 約 8:30pm 到達琴平 Park Hotel. 酒店泊車一晚只係 200 yen. 酒店對面有百貨公司, 烏東店, 麥記及超市, 隔籬有書店, Lawson 同迴轉壽司店, 以鄉下來說, 算是十分方便.

8'45pm 往壽司店食晚飯, 行行書店, 然後去超市買手信同食物.

Day 1 - A4 和牛西冷扒

2006-05-18T17:29:00.000+08:00

8:30am 到達機場 check-in. 入閘後去 Burger King 食早餐.

10:05am CX 506 準時起飛前往大阪關西國際機場 (KIX). CX d 飛機餐越來越唔好食. 呢幾日係日本黃金周o既 U-turn peak, 差不多全機都係日本人.

2:30pm 飛機早了少許到達 KIX. 出閘後坐南海電鐵 rapi:t 往難波轉地鐵往谷(田丁)四丁目.

4:15pm 到達 APA hotel check-in. 酒店o係正谷(田丁)四丁目地鐵站 8 號出口. 呢間 APA Hotel 係o係 18/4/06 才開張, 超新. 房內有20吋 LCD 電視同 Internet Access. 新張期內, semi-double 房 7900 yen 一晚.

4:45pm 坐地鐵往日本橋站行街食 dinner.

5:00pm 由日本橋站進入 Nanba Walk 地下街, 見到大黑屋藥房, 價錢比東京更平, 開始掃貨.

5:30pm 去到 Bic Camera 對面千日前商店街, 本來印o左大疊ぐるなび優惠券, 點知見到一間炭燒
和牛店做特價, A4 級和牛西冷扒由 3500 yen 減到 1980 yen. 考慮o左一陣, 決定冒住被老婆鬧o既風險 (如果唔好食o既話), 放棄燒肉放題去食所謂 A4 級和牛.

6:00pm A4 級和牛果然係非同凡響, 只能用"超正"o黎形容. 唔怪得之咁多人要去日本食.
至於頂級 A5 和牛, 等我中o左六合彩先算吧. 加埋o卑酒同其他食品, 兩人一共食o左
5千幾 yen.

7:30pm 去 Bic Camera 行, 沒有什麼想買 (要買o既, 4 月去東京時已經買o左), 只係見到我上次買個部 Fujitsu notebook 大減價, 平o左起馬 30000 yen :(

8:30pm 行去道頓崛, 去o左激安殿堂買定跟住幾日駕車o既用品, 例如 2L o既樽裝綠茶同零食.

9:00pm 行去心齋橋, 好多舖頭開始關門, 只行了 Uniqlo 同藥房, 然後返酒店.